சென்னை – 1 நவம்பர், 2026 தெலங்கானா மாநிலம் ஐதராபாத் ஜூப்ளி ஹில்ஸ் பகுதியைச் சேர்ந்த பிரபல நடிகையும், தொழிலதிபருமான 52 வயது பெண், சமீபத்தில் டிவி ரியாலிட்டி ஷோ ஒன்றில் பங்கேற்றிருந்தார். அப்போது அந்த நிகழ்ச்சியில் ஏற்பட்ட மோதல் காரணமாக, அவருடன் கலந்துகொண்ட சக ஆண் போட்டியாளர் மற்றும் அவரது ஆதரவாளர்கள் திட்டமிட்டு யூடியூப், எக்ஸ் தளம் மற்றும் இன்ஸ்டாகிராம் உள்ளிட்ட சமூக வலைதள பக்கங்களில் நடிகையின் வயதைக் குறிப்பிட்டு கீழ்த்தரமான ஆபாச வசைகளையும், கேலிச் சித்திரங்களையும் தொடர்ந்து பதிவிட்டு அநாகரிக சைபர் தாக்குதலில் ஈடுபட்டு வந்துள்ளனர்.
இதுகுறித்து நடிகை ஜூப்ளி ஹில்ஸ் போலீஸ் நிலையத்தில் அளித்த புகாரில், ‘சமூக வலைதளங்களில் விஷமிகள் நடத்தும் இத்தகைய கீழ்த்தரமான தாக்குதல்கள் கடுமையான மன உளைச்சலையும் அவமானத்தையும் ஏற்படுத்தியுள்ளது; பொதுமக்கள் மத்தியில் எனது நற்பெயருக்கு களங்கம் ஏற்படுத்தும் நோக்கில் செயல்படும் நபர்கள் மீது கடும் நடவடிக்கை எடுக்க வேண்டும்’ என்று ஆபாசப் பதிவுகளின் ஆதாரங்களுடன் முறையிட்டார். புகாரின் அடிப்படையில் போலீசார் விசாரிக்கின்றனர்.